კოტე მარჯანიშვილის სახელობის სახელმწიფო აკადემიურ თეატრში არსებობს მუზეუმი, სადაც დაახლოებით რვა ათეულ წელიწადზე მეტია დაგროვდა მასალა,რომელიც ძვირფას განძს წარმოადგენს.

მუზეუმში დაცულია მასალები რეჟისორებზე, მხატვრებზე, დრამატურგებზე; მხატვრების ნამუშევრები – მაკეტებისა და ესკიზების სახით, ცხადია, ორიგინალები; მუზეუმის საკუთრებაა ცნობილ მხატვართა: ელენე ახვლედიანის, პეტრე ოცხელის, ლადო გუდიაშვილის, დავით კაკაბაძის და სხვათა თანამედროვე გამოჩენილ მხატვართა ნამუშევრები.

შედგენილია სარეპერტუარო ნუსხა თეატრის დაარსებიდან დღემდე, ქრონოლოგიური თანამიმდევრობით; პრემიერების ანონსების, სპექტაკლების აფიშები, საიუბილეო, შემოქმედებითი და ხსოვნის აღსანიშნავი საღამოების აფიშები, მოსაწვევი ბარათები, პროგრამები, სპექტაკლებისა და რეპეტიციების დღიურები; სამხატვრო საბჭოს სხდომებისა და კოლექტივის საერთო კრების ოქმები; დაცულია პიესები, საგაზეთო და საჟურნალო მასალა თეატრისა, სპექტაკლების, გასტროლების შესახებ, ორგანიზაციებისა თუ კერძო პირების მიერ მორთმეული საჩუქრები.

მუზეუმის პირველი გამგე გახლდათ ნინო სინაურიძე, რომელმაც დიდი შრომა გასწია მუზეუმში საჭირო მასალის მოსაზიდად, შესაგროვებლად, დასახარისხებლად. ფაქტობრივად, მან საფუძველი ჩაუყარა მუზეუმს. მის შემდეგ მუზეუმის საქმე იტვირთა მსახიობმა ბაბო გამრეკელმა. 26 წლის განმავლობაში მუზეუმს ერთგულად ემსახურებოდა მაია კვანტალიანი. ამ ხნის განმავლობაში მუზეუმის მასალა საგრძნობლად გაიზარდა.

მუზეუმის თანამშრომელთა დამსახურებით დღემდე მოაღწია ცნობილი ფოტოგრაფების დავიდოვისა და შიხმანის უნიკალურმა ფოტომასალამ – შუშის ნეგატივებმა და რაც მთავარია – კოტე მარჯანიშვილის პირადმა არქივმა, რომელშიც დაცულია მის მიერ რუსეთში დადგმული სპექტაკლების ფოტომასალა და ესკიზები.

დღეს მარჯანიშვილის თეატრის მუზეუმი ტექნიკურად კეთილმოწყობილია.